Home » Addini (Religios) » Nasiha Ga Mumini

Nasiha Ga Mumini

A wannan zamani da muke ciki Muminai sun fi kowa bukatar karfafa imaninsu da jaddada shi, saboda yadda karfin Duniya ya nufi shafe imani a bayan kasa. Idan an ce imani a nan, ana nufin shafe duk wani abu mai alaka da Addini - musamman Addinin gaskiya - da mayar da mutane kan Ilhadi. Kuma akwai hanyoyi masu yawa da ake bi, tun daga kokari shafe banbance banbance tsakanin Addinai, da kuma yada sharholiya, ta hanyar yada kide-kide da wakoki da wasanni, da buude gidajen rawa da sauran wuraren sharholiya, masu haifar da munafurci a cikin zuciya da kin Addini da fada da shi. Sa'annan kuma a bude wa mutane kofofin lalata tarbiyya da watsi da kyawawan dabi'u da halaye na gari, ta hanyar bude kofar kafofin sada zumunta, don kowa ya koyi rashin mutunci a zubar da kimar masu kima a cikin al'umma, saboda dattaku da riko da Addini. Don haka babbar manufa da aikin mayar da Duniya ta zama kwarya a tafi hanu (globalization), shi ne raba mutane da Addini, a koma rayuwar dabbobi, ba abin da aka sani sai ci da sha da sharholiya. Don haka ka sani kai mai hankali ne. Hankalinka ya nuna maka cewa; ba kai ka samar da kanka ba, kuma ba zai yiwu a ce an same ka ba tare da wanda ya samar da kai ba. Don haka dole kana da mahalicci. Haka kuma ka san cewa; hankalinka ya nuna maka cewa; ba zai taba yiwuwa a ce Mahaliccinka ya halicce ka ne a banza babu manufa ba. A'a, dole halittarka ta zama tana manufa, kuma tana da makoma. Saboda ba za a samu sakamako da natita ta manufar samar da kai a Duniya ba dole sai an koma makoma. Saboda haka Allah shi ne ya halicce ka, kuma akwai manufa game da halittar taka, kuma akwai makoma. Misali wannan shi ne: kana kwance kana bacci, kawai sai ka farka ka ganka a cikin jirgi. To wadanne tambayoyi ne za su fara zuwa a tunaninka, wadanda za ka tambayi wadanda ka gani a tare da kai? Tambayoyi ne guda uku: 1- Wa ya kawo ni nan? 2- Me ya sa ya kawo ni? 3- Ina za mu je? Don haka kamar haka ne, a lokacin da ka tashi ka yi wayo, ka fara fahimtar abubuwa, ka ganka a cikin wannar Duniya, to ya kamata ka san akwai wadannan tambayoyi guda uku, kuma ana bukatar ka san amsarsu. 1- Wa ya halicce ni ya kawo ni Duniya? 2- Me ya sa ya kawo ni Duniya? 3- Ina za mu je bayan Duniya? Saboda haka mai hankali sai ya ajiye sharholiya, ya tsaya ya yi abin da ya kamata.

2022 ago [02-01-22 (18:28)]